Падпісанне Плана сумесных дзеянняў БелГПП і МЗС на знешнеэканамічным напрамку ў 2024 годзе

План сумесных дзеянняў Беларускай гандлёва-прамысловай палаты і Міністэрства замежных спраў Рэспублікі Беларусь на знешнеэканамічным напрамку ў 2024 годзе падпісаны старшынёй БелГПП Міхаілам Мятлікавым і намеснікам Міністра замежных спраў Ігарам Назаруком на пасяджэнні Прэзідыума Палаты.

План вызначае асноўныя напрамкі і формы супрацоўніцтва дзвюх арганізацый па прасоўванні знешнеэканамічнай дзейнасці беларускіх прадпрыемстваў і арганізацый.

У прыватнасці, БелГПП і МЗС будуць сумесна праводзіць мерапрыемствы з удзелам прадстаўнікоў дыпламатычных місій і беларускага бізнесу, арганізоўваць візіты дзелавых колаў за мяжу, а таксама прыёмы замежных дэлегацый, удзельнічаць у арганізацыі і правядзенні за мяжой бізнес-мерапрыемстваў, у тым ліку ў рамках візітаў на вышэйшым і высокім узроўні, пасяджэнняў міжурадавых камісій па гандлёва-эканамічным супрацоўніцтве. Асаблівы акцэнт у гэтай рабоце будзе зроблены на асваенне новых перспектыўных рынкаў для беларускай прадукцыі, развіццё гандлёва-эканамічных адносін з краінамі далёкай дугі.

Акрамя таго, План прадугледжвае сумесны ўдзел у рабоце дзелавых саветаў з замежнымі дзяржавамі, развіццё інстытута прадстаўнікоў БелГПП за мяжой, узмацненне ўзаемадзеяння БелГПП і МЗС у сферы выставачна-кірмашовай дзейнасці, правядзенне інфармацыйна-адукацыйных мерапрыемстваў для беларускіх экспарцёраў па пытаннях пашырэння знешнеэканамічных сувязей і прасоўвання прадукцыі у асобныя краіны і рэгіёны.

Падпісанне дакумента – важны крок ва ўмацаванні партнёрскіх адносін паміж БелГПП і МЗС, які дасць магчымасць павысіць эфектыўнасць знешнеэканамічнай дзейнасці айчынных прадпрыемстваў і арганізацый.

Каменціруючы падпісанне Плана, намеснік Міністра замежных спраў Ігар Назарук падкрэсліў, што дакумент пашырае геаграфію рэалізацыі прадугледжаных ім мерапрыемстваў, з'явіліся ў ім і новыя задачы. У сваім жа змесце дакумент захаваў ад сваіх папярэднікаў ключавыя пытанні і напрамкі дзейнасці і накіраваны на забеспячэнне суправаджэння знешнеэканамічных сувязей сумесна МЗС і БелГПП. Характарызуючы ўзаемадзеянне Беларускай гандлёва-прамысловай палаты і Міністэрства замежных спраў, Ігар Назарук адзначыў яго канструктыўны вектар і канкрэтныя паспяховыя вынікі.