Падпісанне Пагаднення аб супрацоўніцтве з Камітэтам па садзейнічанні міжнароднаму гандлю правінцыі Сычуань, КНР

Пагадненне аб супрацоўніцтве паміж Брэсцкім аддзяленнем БелГПП і Камітэтам па садзейнічанні міжнароднаму гандлю кітайскай правінцыі Сычуань падпісана сёння ў Мінску ў рамках круглага стала Беларусь-КНР (Сычуань), які адбыўся ў Беларускай гандлёва-прамысловай палаце.

Кітайская дэлегацыя на чале з намеснікам старшыні ККСМГ правінцыі Сычуань Ван Гуанцзюнь зацікаўлена ў развіцці міжрэгіянальных і гандлёва-эканамічных сувязей, што і паслужыла імпульсам для сустрэчы і дакументальнага замацавання інтарэсаў двух рэгіёнаў.

Правінцыя Сычуань застаецца адной з найбуйнейшых правінцый краіны з пункту гледжання колькасці насельніцтва, рэсурсаў, эканамічнага развіцця і тэхналагічнага прагрэсу. Яе аб'ёмы вытворчасці збожжа, мяса, рапсу і коканаў тутавага шаўкапрада з'яўляюцца аднымі з самых высокіх у Кітаі. Цалкам інтэграваныя прамысловыя сектары вырабляюць высакаякаснае абсталяванне, электроніку, металургічную прадукцыю, хімікаты, будаўнічыя матэрыялы, прадукты харчавання і шоўк.

Генеральны дырэктар Брэсцкага аддзялення Валерый Лабун агучыў вялікую зацікаўленасць у развіцці ўзаемных кантактаў, новых праектаў і сумесных мерапрыемстваў з дзелавымі коламі правінцыі Сычуань і выказаў упэўненасць, што ў гэтага супрацоўніцтва вялікі патэнцыял.